المساعد الشخصي الرقمي

مشاهدة النسخة كاملة : سهم هيرميس حلال ام حرام


OM HABIBA
18 - 03 - 2006, 15:58
السلام عليكم ورحمة الله وبركاته
برجاء افادتى بشان شراء و بيع سهم هيرميس هل التعامل مع هذا السهم حلال ام حرام
الف شكر
جزاكم الله كل خير

ali
18 - 03 - 2006, 16:39
لو حضرتك مقتنعه بحرمانية أسهم البنوك إذا فهي الأن مثلهم

تامر على
19 - 03 - 2006, 22:30
قرأت بعض التعليقات على سهم هيرمس من حيث الحل والحرمه ...وقد دارت معظم الشبهات حول أن الشركة تدير صناديق ولا تراعى الحل والحرمة فى الاسهم ..بالاضافة الى رغبة الشركة فى الاستحواذ على عدد كبير من اسهم بنك عوده اللبنانى ...
وبمناقشة بعض المتخصصين أفادوا بخصوص استحواذ الشركة على بعض اسهم بنك عوده أن الصفقة لم تتم بعد وانما يتم التحضير لها ...وبناء عليه لايمكن بناء حكم على شىء لم يحدث بالفعل لان حدوث غيره وارد .....مع التسليم بأن الوضع بعد الاستحواذ يختلف ولكن بشرط ان يكون فعلى ..
أما بالنسبة لادارة صناديق الاستثمار فهى كغيرها من مديرى الصناديق تدير صناديق تراعى فى بعضها الحل كصندوق بنك فيصل وذلك بناء على طلب اصحابه .... أو تديره بدون التقيد بشروط الحل والحرمه وهنا يمكن تقدير المسألة بإنها يشوبها شيء من الاختلاط ...يبقى بعد ذلك باقى أنشطة المجموعة وهى لاأعتقد أن فيها شبهة ..زوبناء على ذلك يمكن القول بأنه حتى الان وضع الشركة لم يتغير عن وضعها السابق والذى يقترب من الحل بناء على أنه يغلب على الانشطة الحل بنسبة كبيره اكبر من الانشطة التى "يمكن أن يكون بها شبهه"...أما فى حال استحواذ الشركة الفعلى على اسهم بنك عوده أعتقد أن الوضع سيصبح العكس حيث سيصبح الغالب على نشاط الشركة الحرمانيه ......وبالمناسبة هذه ليست فتوى هذه رؤية خاصة بى من خلال متابعاتى الخاصة وهو ما سأفعله أنشاءالله حيث قررت عدم التعامل على اسهم الشركة إذا استحوذت بالفعل على اسهم بنك عوده ..............دمتم بخير ....................................مع التمانيات بأسعد الاوقات

ali
20 - 03 - 2006, 00:02
أستاذ تامر هي أستحوذت بالفعل علي 20% من بنك عوده

كريم محمد
20 - 03 - 2006, 00:09
السلام عليكم ورحمه الله وبركاته
ممكن انبه حضرتك لبعض النقط
اولا مش اي انسان ممكن يقول حرام او حلال ولكن اهل الدين والعلم والفتوي هما اللي يقدروا يقولوا
ثانيا ان مش معني ان في شركه بتعمل نشاطات بعضها حلال وبعضها حراام والجانب الاكتر فيها الاعمال الحلال تبقي كده حلال ان تشتري اسهم فيها مين اللي قالك كده ؟
ربنا يهدينا ويوفقنا جميعا لطاعه ربنا وتحري الحلال والحرام في رزقنا ولكم جزيل الشكر

تامر على
20 - 03 - 2006, 22:07
استاذ على ... لو سمحت ترسللى توثيق للكلام ده لأنى كنت معتقد كده فعلاً وسألت بعض المتخصصيين فى التعامل مع هيرمس وأفادوا بأن الصفقة لم تتم بعد ...فبرجاء إرسال المصدر لبحثه والإفاده ...كما أننى سأتصل بهيرمس نفسهم وأسألهم للتأكد من صحة المعلومه ....شكراً لتفاعلكم الراقى ودمتم بخير

mohammed rashed ali
24 - 03 - 2006, 19:40
بسم الله الرحمن الرحيم
لا اعتقد ان الحلال و الحرام يتجزء و لا يمكن ان نقول ان هذا الشئ حلال لان الحرام به نسبته صغيره
و شركه هرميس واحده من انشطتها اداره الاوراق الماليه و هى لا تلزم نفسها بالتقيد ببعد الاوراق الماليه اللت تتعامل بها عن الحرمانيه
فهى تتعامل فى الكل الاسهم محليه و عالميه و بالتالى فقد تجد فى محافظها اوراق لشركات خمور او صالات قمار او بنوك ربوية ... الخ
و اذا اعلنت هيرميس انها تلتزم بتنقيه استثمارتها من الاسهم المشبوهه دينيا لكان الامر مختلف

كريم محمد
25 - 03 - 2006, 02:27
الله ينور عليك
انته فكرتني بمثل قراته من فتره الا وهو قطعت جهيزه قول كل خطيب
الله ينور عليك كمان مره

تامر على
25 - 03 - 2006, 22:33
بسم الله الرحمن الرحيم
من الواضح يا جماعه انكم هتجرونى لنقاش انا دايماً مبحبش أدخل فيه لانه ممكن يندرج تحت بند الجدل المذموم ولكن بناء على التعليقات اللى موجوده فيبقى لازم نوضح بعض النقاط لأن كده ممكن يحصل لبس فى فهم الامور عند الناس وده السكوت عنه حرام .
أولاً : اليقين لا يدرأ إلا باليقين
ألأصل فى الأشياء الحل مالم يرد نص بالتحريم ويجب أن يكون النص المحرم قطعى الثبوت والدلاله .. وقد ثبت أن التعامل على الأسهم حلال لأنها عمليات بيع وشراء عادية وخرج من كلامنا السندات حيث ثبت أنها تعامل ربوى .... ولأن التحريم بدون بينة صريحة يساوى بالضبط التحليل مع وجود نص صريح...فقد وجب التأكد من صحة الشبهه بدرجة اليقين (خللوا بالكم من (قد) اللى انتوا عماليين تقولوها ) .
ثانياً: الأموال المختلطة وحكم التعامل معها
وهذه المسألة ليست من (إفتكاسى) الشخصى يا جماعه والله.. دى مسألة يعرفها أنصاف المثقفين دينياً ... وهى بالبلدى كده إن وجد شخص عنده نشاط حلال ونشاط حرام ... ينفع أتعامل معاه ولا لأ .... العلماء قالوا إنه ينفع لو يغلب نسبة الحل فى عمله على الراحج.. وطبعاً هجبيلكم دليل على الكلام ده متتسرعوش .... فيه ناس هتقول ...طيب ممكن أتعامل معاه لكن مش ممكن أشاركه لإن عملية شراء الأسهم هى عملية شراكه مش كده ؟؟ ماشى... هنسلم برأى الناس دى ونتتبع آراء العلماء فى مسألة الأسهم المختلطه وإن كان لا يوجد إتفاق بينهم على النسب الفاصلة وهرفق لكم رأى أكثر الناس تشدداً فى مسألة التحريم وهم علماء الحجاز الأجلاء وهم يأخذون بمبدأ (سد الذرائع )يعنى بالبلدى برضه لو فية شبهة تحريم ولو قليلة يبقى البعد عنها أحسن .... وطبعاً فى علماء بتأخذ بعكس هذا المذهب وهو مذهب (التيسير) لكن أنا لن أستشهد برأيهم مع إنه رأى معتبر وله وجاهته برضه وهرفق لكم بعضه أيضاً .
مما سبق يتضح (والله أعلم) إنى مش (مؤلف) مسألة الأموال المختلطة دى .... صح؟؟؟
ثالثاً إسقاط الدليل على المسألة
ودى أخطر جزء فى الموضوع يا جماعة لأن الإستدلال يجب أن يوافق المسألة محل الحكم وإلا يبقى إللى بيتكلم (نصاب)....أو ليس على علم بالأصول ... .... (وحتى لو نصاب محدش هيعرف غالباً)
المعطيات :
1- شركة هيرمس أصل نشاطها حلال وهو بيع وشراء الأوراق المالية (وهو حلال بإتفاق)
2- شركة هيرمس تتعامل مع أسهم السوق كله التى (قد) يخالطها بعض الأسهم لشركات أصل عملها محرم مما يصبح معه التعامل على أسهمها (أسهم الشركات طبعاً) محرم
3- قامت شركة هيرمس بالإستحواذ (فعلاً) على 20% من أسهم بنك ربوى مما يجعل نسبة الأموال المختلطة فى أموالها (قد) تصل لحد الحرمانيه (أنا إتصلت بهيرمس فعلاً وأكدوا لى المعلومة )
4- لا يوجد معلومات مؤكده حتى الآن أن الشركة تراعى الحلال والحرام إلا بناء على طلب العميل كبنك فيصل مثلاً حيث تراقب هيئة الرقابة الشرعية عمل الصندوق
5- عدد الأسهم المحرمة فى البورصة المصريه يدور حول 60 شركة من أصل 350 (تقريبا)ً أى ان نسبة المحرم على أسوء الإحتمالات وهو أن الشركة متعمده التعامل على الأسهم المحرمه كلها لا يتعدى 15%
6- وهو الموضوع الأساسى اللى أنا كنت بتكلم عنه هو............
هل بعد الإستحواذ على أسهم بنك عوده سيصبح حجم الأموال المختلطة فى هيرمس مقلق ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هو ده اللى أنا كنت بتكلم عنه من البدايه يا جماعة ...هل تم الإستحواذ؟ بعد الإستحواذ الموقف شكله إيه عموماً ؟؟؟؟؟
_ الحمدلله أنا توصلت لإجابة على تساؤلاتى ومش هقول اللى أنا توصلت ليه لحد طبعاً علشان مبقاش (بفتى فيها)... ويبقى تساؤل أخير ياريت يا جماعة نحاول نلاقيلوا إجابة .....
ولا بلاش السؤال علشان محدش يفهمنى غلط ...:)
ملحوظه هامة جداً جداً جداً:
من يعرف مسألة واحده فى الدين معرفة جيده.....يجوز له أن (يفتى ) بها .... لو سمحتوا إبقوا إتأكدوا من الملحوظه دى وقولوا لى رأيكم إيه بس ياريت محدش يقول من دماغه ....ياريت نكلف نفسنا عناء البحث فى الكتب وسؤال أهل العلم وأخيراً ممكن البحت على النت :)
السلام عليكم ورحمة الله وبركاته
أمثله
http://69.20.50.243/shubily/qa/ans.php?qno=31
أمثله أخرى (الأخرى)
http://islamonline.net/servlet/Satellite?cid=1133769954872&pagename=IslamOnline-Arabic-Ask_Scholar%2FFatwaA%2FFatwaAAskTheScholar
http://islamonline.net/servlet/Satellite?pagename=IslamOnline-Arabic-Ask_Scholar/FatwaA/FatwaA&cid=1135001285300
http://islamonline.net/servlet/Satellite?pagename=IslamOnline-Arabic-Ask_Scholar/FatwaA/FatwaA&cid=1122528620792
http://www.elgari.com/article84.htm
http://www.elgari.com/article69.htm
http://www.saaid.net/fatwa/sahm/2.htm

wili
26 - 03 - 2006, 12:40
تحياتى لكل من شارك فى الموضوع فكل المشاركات مثمره وتدل اننا توصلنا اخير لطرق الحوار الجيد

hanyhassan68
06 - 04 - 2006, 16:05
السلام عليكم و رحمة الله و بركاتة

احب ان اتوجة بالشكر العميق للاخ الكريم تامر علي علي الحوار الرائع و المجهود ايضا جزاك الله كل خير يا اخي.
ولكن انا حتي الان اود ان اشتري سهم هيرمس و لن اصل الي الاجابة الصريحة هل حرام ام حلال او ماذا افعل الضبط

ولكم جزيل الشكر

tawab_eg
06 - 04 - 2006, 21:08
من ترك شيئا لله كفاه

الناس شاغلة نفسها بهيرمس ليه
لو بيتحروا الحلال يتركوها مادامت توجد بها شبهة
ومن ترك شيئا لله كفاه
يعني انت لو متحري الحلال وبعت هيرمس حتى ولو خسران إرضاء لله وطاعة له وتجنبا لنواهيه
ان شاء الله ربنا هايعوضك عنها خيرا

محمد نافع
09 - 04 - 2006, 20:27
الأخوه الزملاء
--------------
من الأفضل طرح هذا السؤال على أهل الفتوى طالما السؤال يتعلق بالحلال والحرام مع شرح لطبيعة عمل الشركه تفصيليا وذلك حتى يتسنى لهم إصدار فتوى صحيحه .

M.R. Ahmed
10 - 04 - 2006, 13:37
من ترك شيئا لوجه الله اغناه من فضله فتوكل على الله

AL_MOGAHED
24 - 04 - 2006, 06:01
السلام عليكم ورحمة الله
يا جماعة ايام ما كانت هيرمس ب 30 جم وسهم تعبان ومش لاقى حد يشيلة محدش اتكلم عن حرمانيتة ولو كان حد اتكلم كان هيقول لا لا لا انا مشتريش السهم دة خالص دة حرام يا اخى - طبعا عشان مكسبة مش زى دلوقتى - ولما السهم زاد اضعاف اضعاف ( سبحان الله) باة الجدل عليه جامد اوى - طبعا عشان مكسبة باة رهيييييب جدا -
ياللى متردد فى السهم حط نفسك ايام مكان ب30 جم ودلوقتى لو لقيت نفسك متردد وعاوز تشترية يبقى افتكر قول نبيك ( تعس عبد الدرهم والدينار ) .
اللهم ارزقنا بالحلال يارب.

osama mohamed
24 - 04 - 2006, 21:28
مشاركه فى موضوع هيرمس حلال ام؟؟؟؟؟؟؟؟؟؟
اخوانى اعضاء المنتدى اذا كان 20%من بنك عوده هى مربط الفرس فانا سمعت باذنى رأسى من شيخ الازهر د\ سيد طنطاوى حين كان مفتى الديار المصريه(ان فوائد البنك حلال ومن اخذ برائى فعليا وزره)هذا قوله بالتحديد حين سؤل عن فؤائد البنوك الناتجه من ايداع الاموال وكذلك سمعت من مفتى الديار الحالىد\على جمعه ردا على سؤال هل نخرج الزكاه على اصل المبلغ المودع فى البنك ام اصل المبلغ+ الفوائد فافتى بانه ينبغى اخراج الزكاه على اصل المبلغ والفوائد اذا بلغوا النصاب وحال عليهم الحول مما يعنى ضمنا عدم حرمه فوائد البنوك هذا واحذر نفسى واياكم من الدخول فى التحليل والتحريم لان الفتوى لها اهلها فلا ينبغى ان تؤخذ الا من اهل العلم والاختصاص..........................

AL_MOGAHED
25 - 04 - 2006, 12:43
السلام عليكم
يا جماعة انا رايى ان محدش ياخد براى فرد واحد اواتنين سواء كان شيخ الازهر او حتى المفتى لان كل يؤخذ منه ويرد الا رسول الله ولكن الافضل ان ناخذ براى المجمعات الفقهية سواء السعودية او المصرية او الكويتية مثلا وانا اعلم ان المجمعات الفقهية اجمعت ان فوائد البنوك حرام شرعا .
وبالنسبة ان الشيخ طنطاوى قال ان عليا الوزر لو رايي غلط فدة كلام مش صحيح لان المسلم المفروض يعرف الشيخ اللى افتاله بالفتوى دى اية دليلة واية دليل اللى حرمها ويشوف اية الدليل الاقوى واللى اجمع عليه الناس لان دة دين مش لعبة.
وانا قرات قبل كدة فتوى لطنطاوى قبل ما يمسك الافتاء ان فوائد البنوك حرام (سبحان مغير الاحوال)
واسف على الاطالة, وشكرا

AL_MOGAHED
25 - 04 - 2006, 12:46
واما بالنسبة للشيخ على جمعة فيمكن يكون قصدة البنوك الاسلامية , انا عن نفسى فلوسى فى بنك اسلامى وبطلع الزكاه على اصل المبلغ والفوائد معا فى حالة اذا تعدت النصاب .

تامر على
26 - 04 - 2006, 00:04
السلام عليكم ورحمة الله وبركاته

أحب أن أضيف تعليق بمناسبة البنوك وحكم التعامل معها وأرجو قراءته برويه وعدم التسرع لإستنباط أشياء قبل اكمال القراءة حتى النهايه

أولاً : ما يدخل فى عمل البنوك من الحرام عند جمهور الفقهاء هو الفائدة على ودائع العملاء تلك التى يتم تحديدها مسبقاً . حيث يدخل ذلك فى إطار (الزياده) وهو المعنى اللغوى للربا وأقول (زياده) وليس (قرض) حيث أن الزيادة لايمكن إنكارها بواسطة عاقل أما القرض فيختلفون إختلافاً (صورياً) حول ماهيته. وكذلك الاقراض بفائده مسبقة أيضاً للعملاء الراغبين فى القروض (الصريحة) بزيادة معلومة سلفاً وهو عين الربا .أما باقى أعمال البنوك فحلال بإتفاق
الإشكالية ومحل النزاع أنه عندما ظهرت البنوك الإسلاميه بدأت فى سحب البساط من البنوك الاخرى ...وتوجه الناس لها بإعتبارها حلال أما الاخرى فحرام .....وكانت الاشكالية تنحصر فى كيفية الوصول لفلسفة ما تجد حلا لهذا المأزق العصيب الذى يسحب اموال الناس للبنوك الاسلاميه ....فكانت الحلول أولها إنشاء فروع إسلاميه ..ولم يجدى .....ثم التشكيك فى البنوك الإسلاميه ووضع عراقيل لها ولم يجدى مع نموها بشكل يصعب ملاحقته على مستوى العالم بأسره ...وكان الحل الأخير الوصول لتسويه (دينية) للأمر ....
تأمل معى هذا الحديث للحظه ثم نستكمل

"قال صلى الله عليه وسلم: (إنما انا بشر وإنكم تختصمون اليه ولعل بعضكم أن يكون الحن بحجته من بعض فاقض له بنحو ما أسمع فمن قضيت له بحق أخيه فإنما قطعت له قطعة من النار" والحديث من حديث أم سلمه فى مسند احمد والشافعى وفى المنتقى"
الشاهد من الحديث :
أن البعض يمكنه أن يأخذ من كلام العلماء ما يشاء فالعالم يفتيك على أساس ما تعطيه إياه من معلومات فإذا "لحنت بحجتك" بمعنى أخفيت مواطن الحرمانية وأظهرت مواطن "الحاجه" والحل فسوف تستخرج من كلام العالم ما يوافق كلامك ثم قد يأتى آخر يستفتيه فى نفس المسألة ويعطيه جواباً آخر يتفق مع "مدخلاته" أيضاً وأنا سمعت شخصياً أحد "دكاتره" جامعة الازهر الشيخ عبدالرحمن العدوى يتكلم فى هذا الموضوع وقال أنهم جلسوا مع (رؤساء البنوك ) وسألوهم عن نشاطهم وبعد مداولات توصلت اللجنه أن التعامل مع البنوك حلال...وأنا أقسم لكم أنه لو كان هناك فى نفس اللجنه فريق آخر (متخصص) يرد على كلام (رؤساء البنوك ) ويوضح الصوره من الجانب الآخر لما توصلوا لهذا الرأى ....(هذا بإفتراض أن العالم مجرد عن الهوى الشخصى)
لذالك لا يغتر أحدكم بأن الشيخ الفلانى أحل مهما يكن اسمه أو منصبه لأن فى النهايه
"ونرثه ما يقول ويأتينا فردا" (مريم 80).... أى أنك ستحاسب منفرداً ويجب أن تكون حجتك جاهزه.

MTA
26 - 04 - 2006, 18:32
الراجل ده "تامر على" عامل زى شيخ الأزهر "سيد طنطاوى" لما تسمعله ما تفهمش الحجة الدينية منه - المهم تفهم إن الحاجة حلال و خلاص - بس على مسئوليته ؟؟؟؟؟؟؟؟؟

تامر على
27 - 04 - 2006, 00:43
معلش يا جماعة لو اسلوبى عمل لبس ممكن ابسطه فى كلمتين وبس لإن واضح من الرد الأخير إن اللى وصل عكس اللى انا عاوز اقوله خالص (عموماً أسف لهذا اللبس)
الملخص : إن انا عاوز اقول ان البنوك غير الاسلاميه يحرم التعامل معها للأسباب الاتيه
1- انها تقوم بتحديد فايده مسبقة على فلوس الناس قبل ما تشغلها اصلاً وده بيدخل فى باب (الزياده) من نفس الجنس يعنى فلوس قصادها فلوس وكمان زياده حبّه (وهو ده عين الربا المحرم)حيث أن الربا فى معناه اللغوى=الزياده
2- انها بتقوم بإعادة تسليف الفلوس دى للناس المحتاجه بفايده أعلى من الفايده اللى بتديها للناس أصحاب الودائع وتكسب الفرق وبكده يحصل نفس الإشكاليه الاولى
أما بخصوص فتاوى العلماء بالتحليل فهو لا يستدل به على تحليل التعامل مع البنوك غير الإسلاميه لإن العلماء دول ممكن فتاويهم تتغير على حسب (حاجات) كتيره جداً....منها مكانه كموظف فى جهاز الدوله وبيقبض منها ... ومنها طريقة عرض المسألة عليه والمعطيات اللى هتديهالوا علشان يقول الفتوى ...لكن يظل الأصل هو ما اجتمع عليه غالب علماء المسلمين وأذكر منهم الشيخ عطيه صقر والدكتور يوسف القرضاوى وكل علماء الحجاز .

يارب اكون استخدمت لغة مفهومه...وآسف على الإطاله

osama mohamed
29 - 04 - 2006, 15:37
اخوانى الاعزاء لم اكن اتوقع قط ان تثير مشاركتى فى موضوع هيرمس حلال ام كل هذا الجدل رغم عدم انكار ما قلته . فلو اننى قلت اننى سمعت باذنى راسى احد اشرطه الارصفه او قرأت فى احدى
كتيبتها الممهوره بتوقيع احد المتنطعين المتشددين بغير علم ولا فقه لما واجهت كل هذا الجدل!!!!
انا قلت شيخ الازهر ومفتى الديار المصريه وبالامس فقط سمعتها باذنى راسى من الاستاذ الفاضل
رئيس جامعه الازهر السبق د\ احمد عمر هاشم
ولكن ما أشبه الليله بالبارحه تذكرتها حينما سؤال الشيخ الجليل الامام فخر الدين رضى الله عنه
ولست بصدد التعريف بمكانته حينما سؤل ذات مره هل نتعامل مع البنوك يا عم الشيخ
قال عيشوا زى النا س مهى عايشه
فكرر السؤال بعض الجالسين
فقال عيشوا زى الناس مهى عايشه
فكرر السؤال اخرون؟
فقال حرام عليكم حتى ان تستظلو بظل البنك
ففهما النابهون كذلك
شددو على انفسهم فشدد الله عليهم
ولا حول ولا قوه الا بالله

AL_MOGAHED
29 - 04 - 2006, 17:18
السلام عليكم ورحمة الله
الله ينور عليك يا اخ تامر كلامك مفهوم ووصل .
اية يا استاذ اسامة ؟ انت قصدك تقول ان مادام الشيخ قال عيشوا زى الناس ما هيه عايشة يبقى خلاص بأة عم الشيخ تقريبا كدة حلل البنوك يبقى مش لازم نفهم حللها لية واية دليلة ولا الناس التانية حرمتها لية واية دليلها , صح بردة ؟!! تقصد تقول يا عم عيش باة احنا هنعقد نفسنا لية ؟ ربا اية وبتاع اية ؟ ما الدنيا كلها ماشية كدة , لو كان دة قصدك يبقى اتق الله يا استاذ اسامة
قال رسول الله ( لا تكن امعة اذا اساءوا الناس اسأت واذا احسنوا احسنت ) او كما قال صلى الله عليه وسلم

rihamessam
08 - 05 - 2006, 12:10
السلام عليكم
الفرق بين سهم حلال و حرام هو ان السهم الحلال يكون نشاط الشركة حلال و لا تتعامل بالربا
لا يجوز شراء أسهم الشركات التي يكون أصل نشاطها محرماًُ كأسهم شركات لحوم الخنزير، أو تصنيع الخمور ونحوها مطلقاً ، ولا يجوز مطلقاً شراء أسهم الشركات القائمة على الربا كأسهم البنوك ( الربوية ) .
وأما الشركات التي يكون أصل نشاطها مباحاً كالشركات الزراعية، أو الصناعية، أو الخدمية التي تزرع ما يباح، أو تصنعه ، أو تقدم الخدمات المباحة الجائزة فلا بأس بشرائها، والمتاجرة فيها . ولكن إن كانت هذه الشركات تتعامل بالربا أحياناً أخذاً أو إعطاءً ، وذلك بأن تقوم بتوظيف السيولة النقدية المتوفرة لديها في بعض الأوقات في البنوك وتأخذ فائدة (ربا) عليها، أو تحتاج مثلاً إلى توسعة نشاطها ومصانعها فتقوم بالاقتراض من البنوك بفائدة (ربا)؛ فهذا النوع من الشركات اختلف فيه العلماء والباحثون، فمن العلماء من منع شراء أسهمها؛ نظراً لوجود الربا فيها، وإن كان عارضاً غير أصيل في نشاطها .
ريهام

osama mohamed
29 - 05 - 2006, 12:06
السلام عليكم ورحمة الله
الله ينور عليك يا اخ تامر كلامك مفهوم ووصل .
اية يا استاذ اسامة ؟ انت قصدك تقول ان مادام الشيخ قال عيشوا زى الناس ما هيه عايشة يبقى خلاص بأة عم الشيخ تقريبا كدة حلل البنوك يبقى مش لازم نفهم حللها لية واية دليلة ولا الناس التانية حرمتها لية واية دليلها , صح بردة ؟!! تقصد تقول يا عم عيش باة احنا هنعقد نفسنا لية ؟ ربا اية وبتاع اية ؟ ما الدنيا كلها ماشية كدة , لو كان دة قصدك يبقى اتق الله يا استاذ اسامة
قال رسول الله ( لا تكن امعة اذا اساءوا الناس اسأت واذا احسنوا احسنت ) او كما قال صلى الله عليه وسلم
استاذ مجاهد عفوا انك لم تفهمنى اوكذلك لاتريد
الاختلاف بين العلماء رحمه وانتم تقولون فلان وفلان قالوا حرام
وانا بقول سمعت فلان وفلان قالوا حلاال
يبقى السوال؟
نتبع القاعده الفقيه التى تقول عند اختلاف العلماء اتبع من شئت طالما لم يكن هناك اجماع
او نقعدبقه نسال مين اعلم من مين وسعتها هنكون من الفئه الثالثه!!!!!!!!!!!!!!!!!!!!!
شددوا على انفسهم فشدد الله عليهم ولاحول ولا قوه الا بالله.

osama mohamed
29 - 05 - 2006, 12:12
السلام عليكم ورحمة الله
الله ينور عليك يا اخ تامر كلامك مفهوم ووصل .
اية يا استاذ اسامة ؟ انت قصدك تقول ان مادام الشيخ قال عيشوا زى الناس ما هيه عايشة يبقى خلاص بأة عم الشيخ تقريبا كدة حلل البنوك يبقى مش لازم نفهم حللها لية واية دليلة ولا الناس التانية حرمتها لية واية دليلها , صح بردة ؟!! تقصد تقول يا عم عيش باة احنا هنعقد نفسنا لية ؟ ربا اية وبتاع اية ؟ ما الدنيا كلها ماشية كدة , لو كان دة قصدك يبقى اتق الله يا استاذ اسامة
قال رسول الله ( لا تكن امعة اذا اساءوا الناس اسأت واذا احسنوا احسنت ) او كما قال صلى الله عليه وسلم
استاذ مجاهد عفوا انك لم تفهمنى اوكذلك لاتريد
الاختلاف بين العلماء رحمه وانتم تقولون فلان وفلان قالوا حرام
وانا بقول سمعت فلان وفلان قالوا حلاال
يبقى السوال؟
نتبع القاعده الفقيه التى تقول عند اختلاف العلماء اتبع من شئت طالما لم يكن هناك اجماع
او نقعدبقه نسال مين اعلم من مين وسعتها هنكون من الفئه الثالثه!!!!!!!!!!!!!!!!!!!!!
شددوا على انفسهم فشدد الله عليهم ولاحول ولا قوه الا بالله.

جاد
29 - 05 - 2006, 14:21
الشيخ الغزالي عليه رحمة الله بيقول المسلمين اختلفوا وفي صحة الوضوء هل بمسح ربع الراس ولا نصفه فقال الشيخ الغزالي بان العدو سوف يقطع الراس كلها ويريحهم منها والان المستثمرين الكبار بيقولوا ان كان سهم هيرميس حلال فاحنا بننهبه وان كان حرام فاحنا بنحرقه وسلم لي علي مستثمر المصريه للاتصالات .

:bs_quesexclaim: :medium-smiley-064: :medium-smiley-064: :medium-smiley-064:

rihamessam
31 - 05 - 2006, 17:30
الشيخ الغزالي عليه رحمة الله بيقول المسلمين اختلفوا وفي صحة الوضوء هل بمسح ربع الراس ولا نصفه فقال الشيخ الغزالي بان العدو سوف يقطع الراس كلها ويريحهم منها والان المستثمرين الكبار بيقولوا ان كان سهم هيرميس حلال فاحنا بننهبه وان كان حرام فاحنا بنحرقه وسلم لي علي مستثمر المصريه للاتصالات .
:bs_quesexclaim: :medium-smiley-064: :medium-smiley-064: :medium-smiley-064:

يا افندم سهم هيرمس عليه شبهات كتير بعد المشاركة في حصة بنك وغيره
من الاخبار
و لك و لهم الاختيار

m_a_7
31 - 05 - 2006, 18:29
السلام عليكم يا أهل الجروب
يا ريهام أعتقد إنك تختارى الوضع المتقدم ثم يظهر لكِ نَص الموضوع إذا نزلت أسفل إلى الخيارات الإضافية وفيها خيار إسمه الملفات المرفقة ثم الضغط على التحكم بالملفات المرفقة ثم تعملى براوس لإضافة الصورة من على جهازك إلى الموقع
أرجو الإفاده
شكرأ
محمد أمين

katamish
21 - 06 - 2006, 15:10
إنت هتفتي يا

rihamessam
21 - 06 - 2006, 16:25
السلام عليكم يا أهل الجروب
يا ريهام أعتقد إنك تختارى الوضع المتقدم ثم يظهر لكِ نَص الموضوع إذا نزلت أسفل إلى الخيارات الإضافية وفيها خيار إسمه الملفات المرفقة ثم الضغط على التحكم بالملفات المرفقة ثم تعملى براوس لإضافة الصورة من على جهازك إلى الموقع
أرجو الإفاده
شكرأ
محمد أمين

شكرا يا استاذ محمد
اول مرة اشوف هذه المشاركة

rihamessam
21 - 06 - 2006, 16:29
إنت هتفتي يا

انت بتكلم مين